سيز فائر ٿي ويو، پاڪستان ۽ افغانستان هڪ ٻئي جي سرزمين جو احترام ڪندا: خواجه آصف

لاڳاپيل خبرون

دهشتگرديءَ جي خاتمي تائين سک سان نه ويهڻ جو اعلان، دهشتگردي خلاف جنگ اڄ به جاري آهي: وزيراعظم

قومي سلامتي کي خطرن بابت زيرو ٽالرنس پاليسي آهي، چئلينجن کي منهن ڏيڻ لاءِ پرعزم آهي: فيلڊ مارشل عاصم منير

سنڌ ۾ 70 کان وڌيڪ سول جج ۽ جوڊيشل مئجسٽريٽ جون جايون خالي آهن: چيف جسٽس

دوحه: (مانيٽرنگ ڊيسڪ) دفاع واري وزير خواجه آصف پاڪستان ۽ افغانستان جي وچ ۾ جنگبندي معاهدي جي تصديق ڪندي چيو آهي ته ٻئي پاڙيسري ملڪ هڪ ٻئي جي سرزمين جو احترام ڪندا. قطري پرڏيهي واري وزارت طرفان جاري ڪيل بيان ۾ چيو ويو آهي ته پاڪستان ۽ افغانستان جي وچ ۾ جنگبندي تي اتفاق قطر ۽ ترڪيه جي ٽياڪڙي ۾ ٿيو. ٻنهي ملڪن ايندڙ ڪجهه ڏينهن ۾ وڌيڪ ملاقاتون ڪرڻ ۽ ٻنهي ملڪن جي وچ ۾ امن ۽ استحڪام جي لاءِ مستقل مڪينزم ٺاهڻ تي به اتفاق ڪيو آهي. جنهن کان پوءِ دفاع واري وزير ۽ قطر ۾ ٿيل ڳالهين لاءِ پاڪستاني وفد جي سربراهه خواجه آصف ايڪس تي بيان ڏيندي تصديق ڪئي ته پاڪستان ۽ افغانستان جي وچ ۾ سيز فائر جو معاهدو طئي ٿي ويو آهي. خواجه آصف چيو ته پاڪستان جي زمين تي افغانستان مان دهشتگردي جو سلسلو فوري طور تي بند ٿيندو. ٻئي پاڙيسري ملڪ هڪ ٻئي جي سرزمين جو احترام ڪندا. دفاع واري وزير وڌيڪ چيو ته 25 آڪٽوبر تي استنبول ۾ ٻيهر وفد جي صورت ۾ ملاقات ٿيندي ۽ معاملن تي تفصيلي ڳالهيون ٿينديون، اسان قطر ۽ ترڪيه ٻنهي پاڙيسري ملڪن جي تهه دل سان ٿورائتا آهيون.