سنڌ حڪومت هر مذهب، برادري ۽ طبقي جي خوشين ۾ برابر جي شريڪ آهي: ڊاڪٽر شام سُندر آڊواڻي

لاڳاپيل خبرون

بلوچ عوام جي مدد سان ان پراڪسي جارحيت ۾ افغانستان ۽ ڀارت کي شڪست ڏينداسين: خواجا آصف

عمران خان جي چوڻ تي کيس اک جي علاج لاءِ پمز اسپتال آندو ويو: اعظم نذير تارڙ

هاڻي هڪ ڀيرو ٻيهر انتهاپسندي ۽ دهشتگردي کي شڪست ڏيڻ جي لاءِ اتحاد جي ضرورت آهي: عطاءُ الله تارڙ

ڪراچي(مانيٽرنگ ڊيسڪ)اقليتي معاملن بابت وزيراعليٰ سنڌ جو خاص مددگار ڊاڪٽر شام سُندر آڊواڻي سنڌ حڪومت پاران ديوالي جي موقعي تي 250 هندُو خاندانن ۾ مالي امداد جا چيڪ ورهايا ويا۔ ڪراچي 17 آڪٽوبر: سنڌ حڪومت پاران ديوالي جي خوشيءَ جي موقعي تي 250 هندُو خاندانن ۾ مالي امداد جا چيڪ ورهائڻ جي تقريب منعقد ٿي۔ اها تقريب سنڌ حڪومت جي اقليتي معاملن واري کاتي جي انتظام هيٺ ڪراچي ۾ شاندار نموني سان ٿي، جنهن ۾ وزيراعليٰ سنڌ جي اقليتي معاملن بابت خاص مددگار ڊاڪٽر شام سُندر آڊواڻي، اقليتي معاملن واري سيڪريٽري انجُم اقبال ۽ ٻين آفيسرن شرڪت ڪئي۔ ڊاڪٽر شام سُندر آڊواڻي پنهنجي خطاب ۾ چيو ته چيئرمين پاڪستان پيپلز پارٽي بلاول ڀٽو زرداري جي ويزن ۽ منشور موجب سنڌ حڪومت هر مذهب، برادري ۽ طبقي جي خوشين ۾ برابر جي شريڪ آهي۔ هن چيو ته ديوالي جي هن خوشگوار موقعي تي سنڌ حڪومت اقليتي برادري سان اظهارِ يڪجهتي طور تي غريب ۽ مستحق خاندانن کي مالي امداد تحفي طور پيش ڪري رهي آهي، جيئن اهي به هن خوشيءَ ۾ شامل ٿي سگهن۔ ڊاڪٽر آڊواڻي وڌيڪ چيو ته سنڌ جي ڌرتي رواداري، امن، محبت ۽ ڀائيچاري جو پيغام ڏئي ٿي ۽ سنڌ حڪومت جو مقصد اقليتي برادري جي زندگيءَ ۾ آسانيون پيدا ڪرڻ ۽ انهن کي معاشي طور مستحڪم بڻائڻ آهي۔ ان موقعي تي اقليتي معاملن واري سيڪريٽري انجُم اقبال به پنهنجي خيالن جو اظهار ڪندي چيو ته سنڌ حڪومت اقليتي برادري جي ڀلائي ۽ فلاح لاءِ ڪيترائي منصوبه شروع ڪيا آهن، جن ۾ تعليمي اسڪالرشپس، شادي گرانٽ ۽ مذهبي موقعن تي مالي امداد شامل آهي۔ تقريب دوران خوشي، محبت ۽ ڀائيچاري جو جذبو نمايان رهيو۔ هندُو برادري جي شرڪت ڪندڙن سنڌ حڪومت جي هن قدمن تي خوشي ۽ اطمينان جو اظهار ڪندي چيو ته اهڙا قدم صوبَي ۾ مذهبي هم آهنگي کي وڌيڪ مضبوط ڪن ٿا۔