پاڪستان اسرائيل کي تسليم نه پيو ڪري، ڳالهين کانسواءِ علائقي ۾ امن ممڪن ناهي: نائب وزيراعظم

لاڳاپيل خبرون

پاڪستان سڀني پاڙيسري ملڪن سان معمول جا لاڳاپا چاهي ٿو، ڳالهين وسيلي پراڻا تڪرار حل ٿي سگهن ٿا: وزيراعظم

ڀارت ستلج درياهه ۾ وڏي درجي جي ٻوڏ کان آگاهه ڪري ڇڏيو ،اوچي درجي جي ٻوڏ جي وارننگ جاري، 9 ضلعن ۾ هاءِ الرٽ جاري

سيالڪوٽ پي ٽي آءِ، ٺيڪيدار ڪمپني ۽ ڪامورن تباهه ڪيو:خواجا آصف

نيويارڪ (مانيٽرنگ ڊيسڪ) نائب وزيراعظم ۽ پرڏيهي وزير اسحاق ڊار چيو آهي ته پاڪستان جو اسرائيل کي تسليم ڪرڻ جو ڪو به منصوبو ناهي، آمريڪا جو دورو هر لحاظ کان ڪامياب رهيو، آمريڪي پرڏيهي وزير کي واضح ڪري ڇڏيو ته ڳالهين کانسواءِ علائقي ۾ امن ممڪن ناهي.نيويارڪ ۾ پريس ڪانفرنس دوران اسحاق ڊار چيو ته پاڪستان هر فورم تي فلسطين سان گڏ ڪشمير مسئلي تي آواز اُٿاريندو رهندو. آمريڪي پرڏيهي وزير سان واپار ۽ ٽريف بابت ڳالهيون ٿيون.هن چيو ته ڀارت سان ڊائلاگ ٿيو ته گڏيل هوندو، ڀارت جڏهن به ڳالهيون ڪرڻ چاهي، پاڪستان تيار آهي، ڀارت سنڌ طاس معاهدي کي هڪ طرفو ختم نه ٿو ڪري سگهي. ان کانسواءِ نائب وزيراعظم ڊار ڪويت جي پرڏيهي وزير سان بين الاقوامي فلسطين ڪانفرنس جي سائڊ لائين ملاقاتن دوران عبدالله اليحيٰ ملاقات ڪئي.پرڏيهي کاتي جي ترجمان موجب، ملاقات دوران پاڪستان ۽ ڪويت جي ٻه طرفي لاڳاپن جي وڌيڪ مضبوطي سميت واپار، سيڪيورٽي ۽ دفاع جي شعبن ۾ سهڪار جو عزم ورجايو ويو.ٻنهي اڳواڻن طرفان گڏيل قومن ۽ او آءِ سي سان وڌيڪ سهڪار تي اتفاق ڪيو ۽ اعليٰ سطحي وفدن جي ڏي وٺ تي به راضپو ظاهر ڪيو ويو. نائب وزيراعظم ۽ پرڏيهي وزير سينيٽر محمد اسحاق ڊار فلسطين مسئلي جي پرامن ۽ ٻه رياستي حل جي حوالي سان نيويارڪ ۾ اعليٰ سطحي عالمي ڪانفرنس ۾ شرڪت ڪئي. پرڏيهي آفيس جي ترجمان پاران جاري پڌرائي موجب ڪانفرنس سعودي عرب ۽ فرانس جي گڏيل صدارت ۾ منعقد ٿي رهي آهي. شريڪ چيئرمينز جي قيادت ۽ 8 ورڪنگ گروپس جي ڪردار جي ڪوششن کي ساراهيندي نائب وزيراعظم ۽ پرڏيهي وزير ڪانفرنس سان بامقصد نتيجا حاصل ڪرڻ جي لاءِ پاڪستان جي فعال شرڪت ۽ عزم جو ورجاءُ ڪيو. هن غزه ۾ اسرائيل جي جاري جارحيت جي شديد مذمت ڪندي ان کي ”عالمي قانون ۽ انساني اصولن جو قبرستان“ قرار ڏنو. هن چيو ته 58000 کان وڌيڪ فلسطينين جن ۾ اڪثر عورتون ۽ ٻار شامل آهن، انهن جي قتل کي عالمي قانون، گڏيل قومن جي قراردادن ۽ انصاف جي عالمي عدالت (آءِ سي جي) جي قدمن جي کليل خلاف ورزي آهي. عالمي قدمن جي فوري ضرورت تي زور ڏيندي نائب وزيراعظم ۽ پرڏيهي وزير فوري، غيرمشروط ۽ مستقل جنگبندي، بنا روڪ ٽول انساني امداد تائين پهچ، گڏيل قومن جي اداري يو اين آر ڊبليو اي جي حمايت، جنگي ڏوهن جي جوابدهي ۽ ٻه رياستي حل جي لاءِ هڪ مستنند سياسي عمل جي بحالي جو مطالبو ڪيو. هن فلسطين جي لاءِ گڏيل قومن جي مڪمل ميمبرشپ ۽ عالمي سطح تي ان جي سڃاڻپ تي پڻ زور ڏنو. هن ان ڳالهه تي پڻ زور ڏنو ته ڪانفرنس کي قابل عمل واعدن  سان ٻه رياستي حل جي مرڪزي اهميت کي ٻيهر اجاگر، اسرائيل جي غزه مان انخلا جي مطالبي سان گڏ گڏيل قومن جي سلامتي ڪائونسل جي قرارداد 2735 ۽ او آءِ سي – عرب پلان موجب غزه جي نئين سر تعمير جي حمايت ڪرڻ گهرجي. هن وڌيڪ چيو ته ڪانفرنس ۾ جبري لڏپلاڻ، آبادياتي ڀڃ ڊاهه، آبادڪارين ۽ الحاق کي به رد ڪرڻ گهرجي. فرانس پاران فلسطين جي رياست کي تسليم ڪرڻ جي فيصلي جي آجيان ڪندي نائب وزيراعظم ۽ پرڏيهي وزير ٻين ملڪن کي ان جي پيروي ڪرڻ جي ترغيب ڏني. هن او آءِ سي – عرب پلان ۽ ڪنهن به عالمي تحفظ جي طريقيڪار جي لاءِ فني امداد، صلاحيت سازي ۽ حمايت فراهم ڪرڻ جي لاءِ پاڪستان جي تياري جو اظهار پڻ ڪيو. نائب وزيراعظم ۽ پرڏيهي وزير سينيٽر محمد اسحاق ڊار زور ڏنو ته فلسطين مسئلو هڪ اخلاقي ضرورت ۽ علامي برادري جي لاءِ هڪ امتحان آهي. هن چيو ته قبضو ختم ٿيڻ گهرجي ۽ هينئر ئي ختم ٿيڻ گهرجي، هاڻي وقت اچي ويو آهي ته فلسطين کي آزادي، خودمختياري ۽ رياستي حيثيت حاصل ٿئي.