گڏيل قومن موجب پاڪستان ايندڙ سال خشڪ سالي جو شڪار ٿيندو: شيري رحمان

لاڳاپيل خبرون

خضدار ۾ سيڪيورٽي فورسز جو آپريشن، فتنه الهندستان جا 5 دهشتگرد مارجي ويا

سزائن جو آچر بازار ختم ٿيڻ گهرجي، نفرتن سان پاڪستان جو نقصان ٿيندو: بيرسٽر گوهر

هارين جي نقصان جو ازالو نه ٿيو ته فوڊ سيڪيورٽي خطري ۾ پئجي ويندي: سيد مراد علي شاهه

اسلام آباد(مانيٽرنگ ڊيسڪ) پاڪستان پيپلز پارٽي جي نائب صدر سينيٽر شيري رحمان چيو آهي ته عالمي سطح تي پاڪستان انهن 10 ملڪن ۾ شامل آهي جيڪي پاڻي جي سخت کوٽ کي منهن ڏئي رهيا آهن، گڏيل قومن جي مطابق، پاڪستان هن سال خشڪ سالي جو شڪار ٿيندو.پاڻي جي عالمي ڏينهن جي موقعي تي شيري رحمان پنهنجي پيغام ۾ چيو ته اڄ جي ڏينهن جو مقصد ماڻهن ۾ پاڻي جي اهميت ۽ تحفظ بابت شعور پکيڙڻ آهي.شيري رحمان جو چوڻ آهي ته خدشو آهي ته تربيلا ۽ منگلا ڊيم ڪجهه ڏينهن ۾ ڊيڊ ليول تي پهچي ويندا. پاڻي جي کوٽ سبب موجوده ربيع سيزن جي فصلن کي سخت متاثر ٿيڻ جو امڪان آهي. ملڪ ۾ 40 سيڪڙو گهٽ برسات ۽ برفباري سبب خشڪ سالي جي صورتحال پيدا ٿي وئي آهي.هن چيو ته ٽيوب ويلن جي استعمال ۽ موسمياتي تبديلين جي ڪري اسان جي زير زمين پاڻي جي وسيلن جي سطح هر سال هڪ ميٽر گهٽجي رهي آهي، مستقبل ۾ وڌندڙ آبادي ۽ وڌندڙ گرمي پد جي ڪري پاڻي جي طلب ۾ وڏي واڌ جو امڪان آهي.شيري رحمان چيو آهي ته غير پائيدار زرعي نظام ۽ ٻين سببن جي ڪري پاڻي جي طلب ۾ نمايان واڌ جو امڪان آهي. اسان جو في ماڻهو پاڻي جو استعمال اڳ ئي ٻين ملڪن جي ڀيٽ ۾ تمام گهڻو آهي. جيڪڏهن بروقت قدم نه کنيا ويا ته ايندڙ ڏينهن ۾ اسان کي خشڪ سالي ۽ خوراڪ جي کوٽ کي منهن ڏيڻو پوندو.شيري رحمان اهو به چيو آهي ته پاڻي جي وسيلن کي بچائڻ لاءِ نيشنل ايڊاپٽيشن پلان، لِونگ انڊس، رين واٽر هارويسٽنگ سسٽم ۽ ٻيون پاليسيون فوري طور تي لاڳو ڪيون وڃن.